الرئيسية » Web » Wafa Fares

Wafa Fares

Le cri du froid

صرخة البرد

دجنبر 2002 ، صبات الشتا لأيام متتالية وبدون انقطاع ولو لساعة ، لدرجة أن الفرعية اللي كنت فيها وكانت على جانب من جبل مرتفع ، بداو الشلالات كيتشكلوا حداها ، احنا خدامين ، ماشي حيث كنحبوا العمل والعمل عبادة ، لا …
احنا خدامين حيث هداك هو الحل الوحيد للخروج من روتيت يومي قاتل ، ماكان فيه لا تلفزة ،لا ما ، لا ضو ،لا أنترنت ….
روتين كنت كتكمل كاع الكتب اللي عندك ومكتعاودهم ، روتين كتقرا فيه حتى الكتب المدرسية ديال الاستاذ والتلميذ وحتى الورقة اللي ملوي فيها شوية القزبور والمعدنوس ….
حيث كاين البرد والثلج لدرجة “تصطك أسنانك” لاشعوريا ولايمكنك إيقافها ، بحيث جوج مانطات ثقال مايقدوكش مايقدوكش وبحيث تنعس وانت لابس الماريو كامل …
وكتخرج من فراشك وتلقا واحد الوليدات واقفين فالشتا والبرد ، لابسين ، سمية لابسين .. شي تريكو كاسف ولاوي عليه ميكة مثقوبة كتقطر عليه …
كدخلهم ، وكتحشم وكتقريهم ….
هادشي من غير مناسبة …
هادشي حيث هاد السكان فيهم اللي عمرو شاف المدينة …
هادشي حيث فيهم اللي كيمرض ويموت ومايوصلش للكودرون
هادشي حيث تما كتمرض وتصح بزز منك ، حيث ماعندكش حل …
هادشي حيث تما خاص يكون عندك المونة ديال شهر أو أكثر ديال القطاني والمعلبات والعواد باش ممكن تقدر تعيش في حالات بحال هادي كيتقطع فيهم الحديد لايام او حتى اسابيع .

وفاء فارس